Act 28 | SBE | STEP | Ka sae, na magai wa tamowaidiyao yomai se hedehedede meta bwanabwanaluwa wa hesana ede Melita.

a(Aisaiya 6:9, 10)

Acts 28

Paulo yona miya Melita unai

1 Ka sae, na magai wa tamowaidiyao yomai se hedehedede meta bwanabwanaluwa wa hesana ede Melita. 2 Bwanabwanaluwa wa tamowaidiyao yodi laulau se namwa kalili kalimaiyena. Kaiwa se yuhi na se yoganeigai ka lau ka kaimwaiga, matawuwuna ede nabu ye talu yo gwagwama huyana. 3 Ka kaikaimwaiga, na Paulo ye lau kaiwa ye bahema bena ye gabudi. Na kaiwa kalakalasina wa gigibwalina unai mwata hesau kaikaikalasina ye nene pesa ede Paulo nimana ye kalasi na unai ye kabakabasi. 4 Magai wa tamowaidiyao mwata wa se kita Paulo nimana wa unai ye kabakabasi, unai se wane, “Teina tamowai ta meta iya tau kaikaiunu! Yodi yoli wa unai nige ye mwaloi, na iyamo yoda yaubada Tautolehedudulai nige ye henuwa bena ye maumauli.” 5 Na Paulo nimana wa ye hekwade ede mwata wa ye koihebeku dobiyei kaiwa kalakalasina wa unai, na kamnana ye lapui meta tauna wa nige se kamkamna. 6 Na tamowai wa yodi nuwanuwatu kabo Paulo tauna se loloni yo ye guli na ye mwaloi, na iyamo se naya huya lohaloha na se kita meta nige saha hesau ye tubu kalinawai. Unai yodi nuwatu wa se bui uyoi na se hedede meta iya yaubada hesau.

7 Yoma kaba kaimwaiga wa dedekana wa unai meta bwanabwanaluwa tamowaidiyao kadi tanuwaga lakilakina hesana Pabiliyasi yona tano. Ye yogaisinigai yona numa ena ka miya na mayadai haiyona ye kitahetete namwanamwa kaliliyegai. 8 Na Pabiliyasi tamana ye kasiyebwa na ye kenokeno yodi numa wa unai. Kana kasiyebwa meta tau gwagwama yo bogalau. Paulo ye sae numakalo wa unai na taubada wa yona ye tapwalolo, na nimana ye tolesaedi taubada wa unai ede ye namwanamwa. 9 Unai tau kasiyebwa maudoidi bwanabwanaluwa wa unai se laedima, na Yaubada yona gigibwali yena Paulo tamowai wa ye henamwanamwadi. 10 Unai tamowai maudoidiyao wa se hekasisi kaliliyegai yo se kaikainauyaigai. Na huyana kabo bena waga hesau unai ka gelu, ede yoma kabinonoha wa unai kadau gogodiyao udiyedi se saguigai.

Paulo ye lau ye lage Loma

11 Huya gwagwama wowolina wa debanaena Alesandiliya yodi waga hesau bwanabwanaluwa wa unai ye miyahekila. Waga wa isuna unai Giliki yodi yaubada labui Kasta yo Polakisi tautaudi se pusae na se tolehepatu.

Ka miya nawalai haiyona, na wowoli huyana wa ye gehe ede waga wa unai ka gelu na ka hetubu ka kadau ka lau Loma. 12 Silakusi unai ka duna na menai ka miya mayadai haiyona. 13 Menai ka gelu uyo ka sae Legiumu unai ka duna. Mala ye tom na yawana ye towa, ede ka gelu uyo, na mayadai hesauna unai ka lage Puteyoli. 14 Temenai Yesu taukawamamohoiyena tamowaidiyao hekadi ka lobaidi, ede se yogaisinigai na menai ka miya mayadai haligigi-labui, mulidi yena kabo ka sae Loma. 15 Loma unai Yesu taukawamamohoiyena yoma sae wasana se lapui, ede se dobima Apiusi Yona Kaba Lokulokune yo Kaba Kaiyawasi Numana Haiyona magaidi udiyedi se launayanayaigai. Paulo tamowai ta ye kitadi meta nuwana ye bayao na tapwalolo ena Yaubada ye lautokiyei. 16 Loma unai ka lage ede iyala kapinana wa Paulo ye talamgabaei ye lau ye bom yona kaba miya, na tauiyala tamowaina hesau ye lau Paulo ye kitahetete.

Paulo yona miya Loma unai

17 Mayadai haiyona mulidi yena Paulo Dius babadadiyao Loma unai taumiya ye yoga gogoidima na ye hededelau udiyedi ye wane, “Kehaguwao, nige saha yababana hesau ya ginauli yoda tamowai yo kada kulutubu kabikabidi yo miyamiyadiyao udiyedi, na iyamo Dius babadadiyao Yelusalema unai se haigaibuigau na se moselaegau Loma yodi laugagayo taukitahetetena tamowaidiyao udiyedi. 18 Se henamaiyegau meta nige kagu mata hesau yababana se lobai bena kabo unai se unuhemwaloigau, ede lauhetala wa unai bena se yailigabaeigau. 19 Na Dius babadadiyao nige se henuwa bena lauhetala unai se yailigabaeigau. Ede ya kaibwada taba bena ya laoma Loma, na Sisa kabo ye helauhetalagau. Na yogu laoma ta unai meta nige bena helegu Dius tamowaidiyao ya hegiludi. 20 Teina nuwatu ta debanaena ede ya hedede kwa laomagogoi, na ya hedehedede kalimiuyena ta. Seni ta unai se paigau, matawuwuna ede kita Dius yoda sunuma saha kabo ye tubu huya matada ena.”

21 Unai Dius babadadiyao se hededelau Paulo unai se wane, “Nige sola leta hesau Yudeya unai se hetamaliyama na unai wasam ka kita, o tamowai hesau metai ye laoma na wasam yababana hesau ye hedede kalimaiyena. 22 Na ka henuwa bena taba ka laomagogoi na yom nuwatu saha ku hededehemasalahadi na ka lapuidi, matawuwuna ede teha maudoina tamowaidiyao meta kada boda ta unai yom tapwalolo kabikabina ta se hedehedede heyababa.”

23 Unai yodi laomagogoi mayadaina se godu, ede boda lakilaki se laoma Paulo yona kabamiya wa unai na ye lauhekataedi, malatomtom yena ye hetubu ye lau ee meimeilahi. Yaubada yona basileiya hedehededena ye hededehemasalaha, na Mose yona laugagayo yo peloweta yodi kulikuli udiyedi ye hekitadi meta Yesu Yaubada yona kaisunuwa tamowaina ede. 24 Yona hedehedede wa udiyedi meta tamowai wa hekadiyao yodi talam se ginauli, na hekadiyo nige se kawamamohoi. 25 Unai ede se bom se haihaikawayagala uyoidi. Na bena kabo se dahalai gwaligwali se lau yodi magai, unai Paulo yona hedehedede gehegehedi ye hedededi kalidiyena ye wane, “Yaluwa Tabuna saha peloweta Aisaiya ye hekata na ye hedede gabaedi kami kulutubu udiyedi meta se laoma se mamohoi. 26 Doha Yaubada ye hededelau Aisaiya unai ye wane,

‘Ku lau tamowai ta udiyedi na ku hedede ku wane,

“Yogu hedehedede kabo kwa lapulapuidi,
na taba nige kwa lapulobaidi.
Yogu laulau yo yogu kabikabi kwa kitadi,
na taba nige kwa kitalobaidi.”
27 Mata wuwuna tamowai ta nuwadiyao meta se kwailolo kalili,
beyadi se kolakola,
yo matadi se gibu.
Na taba matadi se lala, kabo se kitalobai,
yo taba beyadi se malapai, kabo hedehedede se lapulobaidi,
yo taba nuwadi se masalaha, kabo se nuwatu lobai,
na nigele.
Unai nige gonowana se nuwabui na ya henamwanamwadi.’ ^a
28 Unai ede ya henuwa bena kabina kwa kata meta Yaubada yona kabihemauli ye ginauliyako yo wasana ye laoko dagela tamowaidiyao udiyedi. Na siya kabo se lapulau Yaubada yona kabihemauli hedehededena ta unai.” ^{▼▼28:29 Kulikuli hekadiyo lausoisoi 29 se kuli doha teina:Paulo yona hedehedede wa ye gehe ede Dius tamowaidiyao se pesa na ma kalina lakilakidi se bom se haihaikawayagala uyoidi. Tausonoga lausoisoi ta nige se lobai buka beyabeyadiyao udiyedi, unai nige ka kuli buka ta unai.}

30 Paulo yona numa ^{▼▼28:30Paulo yona numa Loma unai ye miyai na nawalai kesega kesega ye hemahemaisa. Dimdim unai se kulirented house.} wa unai ye miya bolimai labui. Na kaiteyadi se laoma bena iya se kita meta ye yogaisinidi, 31 na ma nuwa bayaona Yaubada yona basileiya wasana ye lauguguyaei yo Guiyau Yesu Keliso wasana ye lauhekataei udiyedi. Na yona paisowa wa unai meta nige tamowai hesau ye gudugudui.